Ua peia le taualuga o manu’a ma ua ufitia ai i le ao pogisa le itumalo o le Vaimauga ona o le valaau paia a le Atua i le afioga Faaolesa Katopau Ainuu o se tamalii sa seei i le tofi faipule o le Vaimauga i Sisifo i le paeaiga faapalemene o le tausaga e 2016 i le 2020 a o le’i teuteuina le faavae ma le tulafono o faigāpalota ma toe suia ai vaevaega o itumalo faapalota o le atunuu.
Sa tauva i le nofoa o le Vaimauga 4 i le palota tele ia Aokuso o le tausaga na te’a nei ae e le’i manuia.
O le paeaiga 16 a le Palemene na seei ai o ia i le tofi Minisita o le Kapeneta mo le Matāgaluega o Faamasinoga ma le Faafoeina o Matāupu Tau Faamasinoga.
O lona taimi i le tofi minisita mo lea matāgaluega na teuteu ai le faavae ma suia ai le faatulagaga o le pulega o le faamasinoga ma māfua ai feteena’iga o finagalo ma taofi o le Palemene ma le atunuu a o loma le palota tele na faia i le tausaga e 2021.
O Faaolesa Katopau Ainuu o se loia sinia ma o loo iai lona ofisa loia tuto’atasi i Malifa o loo galulue ai nisi o loia i le vaega tuma’oti.
E tuumalo le afioga Faaolesa Katopau ua 62 tausaga, e le’i faamautūina se aso e faia ai ona toe sauniga ae o le afiafi o le Aso Toona’i na te’a nei na tuumalo ai.
