Ua toe faalēaogāina pe suia e le Peresetene o Amerika o Donald Trump se tasi o faai’uga autū mai le vaitaimi o Obama, o se faai’uga sa faamauina ai gaioiga uma a le faigāmalo e faatatau i kasa e velasia ai le si’osi’omaga poo paneta.
O le su’esu’ega sa faia i le 2009 na iloa ai e iai nisi o kasa, greenhouse gases e avea ma faamata’u i le soifua mālōlōina lautele ma o i na amata ai taumafaiga e faaitiitia lea tulaga aemaise lava i taavale.
Ua faaigoa e le Fale Pa’epa’e le gaioiga ua faia e Trump o se tasi o suiga tele ua faia i le talafaasolopito o Amerika ma ua faailoa o le a taugofie ai taavale ma faaitiitia ai ma tau mo i latou e gaosia taavale.
Ua faaleo i le lipoti a le BBC finagalo mai nisi o kulupu tau le si’osi’omaga o se toe foi tele lea i tua i taumafaiga e faaitiitia suiga o le tau ma o le a oo le matāupu i le faamasinoga.
Ua faailoa se finagalo o Obama i luga o le upega tafa’ilagi o le X e faapea a aunoa ma le faai’uga lea sa faia i le 2009 ua faaitiitia le saogalemū o tagata ma le soifua mālōlōina, itiiti foi ma avanoa e finau atu ai i suiga o le tau, ma ua faatino uma ia suiga ina ia faateleina tupe a i latou o loo i le auaunaga tau suāuu.
Puna o Faamatalaga: https://www.bbc.com/news/articles/cn0zdd7yl4vo
