E foliga ua toe sologa lelei le auaunaga a le Instagram i le mae’a ai o se taimi i le taeao analeila sa motusia ai ma lē mafai ona faaaoga e nisi e pei ona masani ai ona o se faaletonu.
Fai mai o le faaletonu na matauina i le lalolagi atoa ma e silia ma le itula na tulai mai ai lea faaletonu a o lei toe faaleleia ma toe avanoa mo le faaaogaina.
E le o iai nisi faamatalaga o avanoa mai e tusa o le mafuaaga o le faaletonu ae mautinoa e toatele na silafia lea tulaga i le taeao analeila ma taumafai ai e fesootai i le kamupani i le mafuaaga o le faaletonu.
E lei aafia ai le Facebook lea foi e umia e le kamupani a le Meta e umia foi le Instagram.
O le Twitter foi sa faagasolo pea e pei ona masani ai lana auauaga i le taimi lea.
O le Instagram e faaaoga e faasoa ai ata ma fesootaiga ma e faaaoga e le faitau miliona o tagata i le lalolagi ae faapea foi i pisinisi.
Sa faailoa foi le faatoese ane o le auaunaga i ana paaga ona o se faaletonu sa iai ae ua toe ola nei ma faaaoga e pei ona masani ai.
O le masina o Mati i lona amataga na tulai ai ai foi se isi faaletonu faapea e umi atu ma le tasi le itula.
