O le vaiaso lenei o le a silasila ai le Faamasinoga o Apili, pe talafeagai ona faagasolo le talosaga a le alii lea na fasiotia le to’a 51 o tagata a o auai ia latou sauniga tatalo i o latou malumalu i Kalaiesetete, le Al Noor Mosque ma le Linwood Islamic Centre i le aso 15 o Mati 2019, i sana osofa’iga faatupu faalavelave.
O le alii Ausetalia o Brenton Tarrant o loo taumafai e apili ona moliaga ma lona faasalaga o le faafalepuipui mo le olaga atoa e aunoa ma se avanoa e palola ai.
O Mati i le 2020 na ioeina ai e lea alii i le Faamasinoga Maualuga ona moliaga e 51 o le fasioti tagata faamoemoeina, o moliaga e 40 o le taumafai e fasiotia nisi, ma le moliaga e tasi o faiga faatupu faalavelave.
O Aokuso o le tausaga lava lea e 2020 na lau ai le i’uga o lea alii e soloatoa i le falepuipui e lē mafai ona palola, ae o lea ua mana’o e toe apili ona moliaga ma lona faasalaga, ma o le a silasila iai le Faamasinoga o Apili pe talia lana talosaga.
E vaiaso atoa ua fuafua e fofogaina ai lenei mataupu, ma e ono tula’i ai foi lea alii e tuuina atu ana faamaoniga mo lana talosaga.
E tusa ai ma se lipoti mai le RNZ, o le a mua’i iloilo e le faamasinoga lana talosaga e toe faaui i tua ana tali ioe i ona moliaga, ona o le mau e faapea, e le’i sagatonu lelei le mafaufau o lea tagata faatupu faalavelave e fai ai ni ana faai’uga sa’o i le taimi na tali ai i ona moliaga, ona sa mafatia i tulaga ogaoga ma le leaga sa afaina ai i le taimi a o taofia i le falepuipui.
Afai ae talia e le faamasinoga le toe faaui i tua o ana tali i ona moliaga, ona ave lea o le matāupu i le Faamasinoga Maualuga e toe tula’i ai lea alii faatupu faalavelave e tali i ona moliaga.
Ae afai e teena e le faamasinoga lana talosaga, ona toe valaau lea o se isi iloiloga a le faamasinoga mo lona faasalaga, i se taimi lava o le tausaga nei.
Lipotia o le a matuā faamautinoa le puipuiga mo le saogalemu o le falefaamasino i le taimi e faagasolo ai lenei matāupu, e faatapulaa foi i latou e mafai ona auai i le potu faamasino, i na o loia, le vaega a le media, o tagata ofisa a le faamasinoga ma i latou ua iai le faatagana e auai.
O le a faaali i luga o le televise le fofogaina o lenei matāupu i le isi potu faamasino o loo sosoo ane, i le Faamasinoga Apili, faapea i Faamasinoga o Tulafono poo Law Courts i Kalaiesetete, ina ia mafai e i latou na aafia faapea o latou aiga, ona maimoaina taualumaga a le faamasinoga.
Puna o Faamatalaga: https://www.rnz.co.nz/news/national/586264/court-to-consider-christchurch-terrorist-s-appeal-application
