Ua tuana’i le Aso Tofi ua mavae sa faatulaga e le komesina o faigāpalota ma lona ofisa e tapunia ai le avanoa e toe faaui ai i tua se suafa o se sui tauva mo palota laiti a Safata 1 ma Vaisigano 2, ua faatumau lava suafa o sui faatutū na lesitala atu mo ia faigā filifiliga.
O Safata 1 e to’alima sui tauva ma o le to’afā e aofia ai tama’ita’i e to’alua o le a finau i le fu’a a le vaega faaupufai o le Faatuatua i le Atua Samoa ua Tasi, ae to’atasi o le a tauva i le fu’a a le vaega faaupufai e puipuia aiā tatau a tagata.
I Vaisigano 2 e lua sui o le a faia iai le filifiliga a lea itumalo faapalota, o le a tauva mo le Faatuatua i le Atua Samoa ua Tasi ma le vaega e puipuia aiā tatau a tagata.
Ua faailoa lautele mai falepalota mo ia palota laiti e pei ona faailoa lautele e le ofisa o le komisi o faigāpalota e 9 falepalota mo le itumalo o Safata 1.
Peita’i e valu falepalota e faato’ā faaaogā i le Aso Faraile 27 o Fepuari i le palota laitiiti ae o le palota muamua poo le pre polling i le Aso Lulu 25 o Fepuari o le a faaaogā le falepalota o le maota o le ekalesia EFKS i Saanapu uta.
Mo le itumalo o Vaisigano 2 e lima falepalota ma e fā e faato’ā faaaogā i le Aso Faraile 27 o Fepuari mo le palota laitiiti ae o le falepalota numela lima le maota o le Ekalesia Metotisi i Sataua o le a faaaogā mo le palota muamua i le Aso Lulu 25 o Fepuari.
O falepalota tausāvali poo mobile booths i Upolu o le maota gasegase i Motootua i le vaega o loo iai le falema’i faamamā toto, ma le nofoaga o loo tausia ai tamā ma tinā matutua i Mapuifagalele.
I le motu o Savaii o falepalota tausāvali o maota gasegase i Tuasivi, Vaipouli, Safotu, Sataua ma Foailalo.
O le falepalota faapitoa poo le special booth o le maota o le Tooa Salamasina i Sogi lea o loo iai le Matāgaluega o Tinā ma Tama’ita’i, Atina’e o Afio’aga ma Aga Fesoota’i.
O le vaiaso a sau nei e faia ai palota laiti a Vaisigano 2 ma Safata 1.
Afai o le taunuuga o ia palota laiti e manumālā mai se sui tauva tama’ita’i o le a atoa ai loa nofoa e ono o tama’ita’i i le Palemene.
Peita’i afai e lē o le tulaga lea e taunuu iai o le a faaaogā loa aiaiga o le faavae e sa’ili ai le nofoa faaopoopo o tama’ita’i i le Palemene ae e fua i le tagi tau palota a Falealili 1 lea e le’i mae’a o loo taoto pea i foga a le malo.
E pei ona silafia sa iai le finauga faaletulafono a le vaega faaupufai o loo agaia le malo sa fofogaina i le faamasinoga sa finau ai ua tatau loa ona sa’ili le nofoa faaopoopo e atoa ai le ono o nofoa o tama’ita’i faipule i le Palemene, peita’i ua aumai le faai’uga ua teena lea finauga ona ua mautū le i’uga a le faamasinoga o talosaga o loo aiaia ai, e faato’ā faaaogā le Vaega 44IA o le faavae e sa’ilia ai le numela e atoa ai nofoa o tama’ita’i pe a mae’a uma faamasinoga o matāupu o tagi o le palota.
E lē o iloa pe iai ni tagi e toe faaulu pe a mae’a le faai’uga o palota laiti o loo loma nei.
