O le ulua’i vaiaso o le masina lona lua lenei o Fepuari 2026 ua faailoa ai e le ofisa sooupu o le malo le tauaao ai e le afioga i le Ao Mamalu o le Malo le afioga Tuimalealiifano Vaaletoa Sualauvi II o tusi tofiga taualoa, o le sui o le malo o Papua Niu Kini mo Samoa ma le sui o le malo o Hungary.
O le Komesina Maualuga fou o lea malo o le Pasefika o Sekias Tameo o loo avea foi ma sui o lona malo i le atunuu o Niu Sila.
O lana folasaga i le feiloa’iga ma le Ao Mamalu o le Malo sa ia faailoa ai le faaauau pea o sootaga vāvālalata o malo e lua ae o Samoa o se atunuu e manatua pea i le galuega a misionare o le lotu LMS sa galulue ai i lea atunuu.
O nisi foi o alo ma fanau a Samoa sa a’oa’oina i le iunivesite a Papua Niu Kini o se isi lea o sootaga o atunuu e lua.
O le tausaga e 1979 na ulua’i faavae ai sootaga faavaomalo o Samoa ma Papua Niu Kini.
O le sui o le malo o Hungary le alii amepasa o Gabor Tamas Nagy sa avea ma sui o lona malo i le atunuu o Lithuania a o le’i filifilia e avea ma amepasa o lona malo mo Samoa, o se atuuu na amata faavaeina ona sootaga faavaomalo ma Samoa i le tausaga e 2011.
