O ananafi, Aso Tofi, 12 Fepuari 2026, lea na lauina ai le faasalaga o le tamā ia Moeaia Tuai, ina ua faamaonia e le vasega o faatonu i le tausaga talu ai, ona moliaga e lua o le faapologaina o nisi, o isi moliaga e lua o le faia o ni feusua’iga faamalosi ma le tele o nisi moliaga o sauāga matagā na ia faia i ni talavou se to’alua sa i lalo o lana vaaiga.
O Tuai o se tagatānuu Samoa, ua 63 tausaga o lona soifua, ma o lea ua faasalaina faafalepuipui mo le silia i le 16 tausaga.
I se faamatalaga o aafiaga na faitauina mai se tasi o i la’ua na aafia i solitulafono a lenei tamā, na ia ta’ua ai o sauāga na faia ia te ia ua aveesea ai e lenei tamā lona olaga fiafia faatama’ita’i talavou, o ona faalogona ma lona teine taupou, ma e iai taimi e oo ia te ia lagona e peisea’i ua alu ese lona agaga mai lona tino.
Fai mai atili lenei tama’ita’i talavou, o le tele o taimi e momoo ma’imau pe ana faapea e le’i iai iinā, ma momoo ma’imau pe ana faapea sa ola i se olaga masani e ausia ana moemitiga o se tama’ita’i talavou ma ola sa’oloto.
Ae pagā lea, sa ou ola o se teine e tauivi ma le ogaoga ma le matuitui o mafatiaga sa lē tatau ona ou fesaga’ia.
Na ta’ua e le afioga i le faamasino na faia lenei faamasinoga, Justice Michele Wilkinson-Smith, o le mafaufau sa iai ia Tua’i, e iai lana aiā na te pulea ai tupe o totogi mai galuega a nei talavou e faatupe ai ona mana’oga ma faamata’u nei talavou e toe tipoti i Samoa pe a lē usita’i.
E iai le talitonuga o i latou na faia su’esu’ega o matāupu faapea, o solitulafono nei ua faamaonia o Tuai i faiga faapologa, ua lona lima iai soligatulafono faapea i le talafaasolopito o Niu Sila.
Puna o Faamatalaga: https://www.rnz.co.nz/news/national/586658/former-prison-officer-turned-slavemaster-moeaia-tuai-jailed-for-more-than-16-years?cid=newsletter
