Ua saunoa le faia’oga o le Moana Pasifika i le leitio faavaomalo a Niu Sila, e na te talitonu o loo mana’omia lava se galuega tele e faia e faamautinoa ai le tulaga lelei ma le faaauau pea o ‘au e lua a le Pasefika i le taamilosaga a le Super Rugby Pacific ma ia iai pea i se tulaga maualuga.
O le faamatalaga lea na faia e Umaga ina ua mae’a le taaloga a le Moana Pasifika ma le Fijian Drua i le la fetauiga muamua i Lautoka i le faai’uga o le vaiaso.
Ta’ua e Umaga le tulaga lelei o le aofia o ‘au ia e lua i le taamilosaga aemaise ona o loo siitia ai foi ma le tulaga o kalapu i atunuu o le Pasefika e pei o Fiti, Samoa ma Tonga.
Ta’ua e Umaga e tatau foi ona tuuina avanoa i tamaiti o loo faasolo ane i le lakapi auā o loo vaaia lava le to’atele ma o le autaaalo mai le Pasefika e maua ai le 40 pasene o tagata taaalo i le lakapi iuni ma le lakapi liki ma e mana’omia pea lava foi e le Moana ma le Drua le fesoasoani ina ia faatumauina le lelei o a la polokalame tau atia’e ia faatumauina ai le lelei foi o tapenaga.
Na mālō le Moana Pasifika i le la taaloga ma le Drua lea na tulaga ese ai foi le taalo a le kapeteni o le Moana, Miracle Faiilagi na maua sikoa e 3 mo le Moana Pasifika.
Puna o Faamatalaga: https://www.rnz.co.nz/international/pacific-news/586980/moana-pasifika-fijian-drua-don-t-get-enough-need-more-recources-umaga
