E ui ina fesiligia e nisi o faipule o le Itu Agai suiga ua faatino i le tofia o ta’ita’ifono ma sui o komiti o Fono Faavae, peita’i o le sainia ai o maliega mo le faamatuuina atu o vaegatupe muamua o le poloketi miliona mo le paea’iga fou 18 a le Palemene ua molimauina ai o loo aofia itumalo o Lepa, Faleata 3, ma Falealupo, i maliega sa sainia i le Aso Gafua o lenei vaiaso.
Ua na o itumalo e tolu e lē o aofia i maliega ua mae’a sainia e aofia ai Anoamaa 1 le itumalo palota o le Minisita o loo iai le vaaia o le poloketi, o Siumu, ma Faasaleleaga 2.
E iai to’a o loo māfua ai ona lē sainia maliega a Siumu ma Anoamaa 1 ae o Faasaleleaga 2 ua iai le faai’uga a le Kapeneta e taofi le faamatuuina iai o tupe o le poloketi ona e lē o talia e lea itumalo suiga ua faataoto e le malo i le filifiliga o ta’ita’ifono ma sui o komiti.
O le toe faaauauina o lea poloketi o le atina’e manuia o nuu ma afio’aga o itumalo i le paea’iga fou ua iai nei a le Palemene mo le isi lima tausaga, ua faatino ai ma se isi o suiga o le saini faatasi uma lea o maliega ma amata faatasi galuega o le atina’e o itumalo, se’ia vaganā ai Fono Faavae e tolu e pei ona faailoa atu.
O itumalo palota e 48 ua mae’a sainia maliega o le a faamatuu iai le ta’i miliona valu selau afe tālā.
O le ta’ita’i o le malo le afioga i le Palemia na saunoa e tatala le sainiga o maliega mo sui o Fono Faavae ma le apoapoa’iga ia tautuanā ia sagatonu ma manino le faagaioia o atina’e ia ogatasi ma ta’iala o le poloketi.
