O loo iai le popolega tele o leoleo i se tinā ua savali i le ono masina o sa’ilia, ma ua tau aga’i le talitonuga atonu e iai se gaioiga faasolitulafono na faatino i lenei tinā.
O le aso 22 o Oketopa i le tausaga talu ai na lipotia ai e le tuaa tinā o Rowena Walker o loo sa’ilia lana tama, ae i se faatalanoaga a le Radio New Zealand ma le Satini Sinia o Jo Carolan, na ia saunoa ai, o le taimi mulimuli ua faamaonia le vaaia ai e se tasi Rowena i Kalaiesetete, o le aso 14 o Aokuso i le tausaga talu ai.
E foliga mai o le aso 15 o Aokuso o le aso mulimuli lea na toe faia ai ni ana tusitusiga i luga o le social media, o lana telefoni ma isi vaega faapena, ma o le aso mulimuli foi lena na toe maua ai ni ana fesoota’iga ane i lana fanau, o se mea e lē masani ai mo Rowena.
O loo faagasolo pea su’esu’ega ma sa’iliga atu a leoleo i nisi o lipoti o loo faaoo ane, ae o se popolega tele lea, ona ua ono masina ae matuā leai se mea ua tau mautū ane ai se vaega e ono aga’i iai sa’iliga.
Saunoa Carolan, e ui i le umi o le va o le taimi lea na misi ai lea tinā ma le taimi na faato’ā logoina ai e le aiga leoleo, ae o loo malosi lava le faatinoga o galuega sa’ili a leoleo su’esu’e ai lenei matāupu.
O le numera 0800 555 111 e ao ona vili pe a iai lava sina faamatalaga e ono fesoasoani i le sa’iliga a leoleo o loo faia nei.
