O le Tupu o Peretania ma lana Masiofo o Camilla o le a talimalo i le asiasiga a le Peresetene o Nigeria i lea atunuu.
O le ulua’i malaga asiasi lea i le United Kingdom mai lea atunuu talu mai le 37 tausaga talu ai.
O loo faailoa e le BBC ma faamaonia e le Buckingham Palace, o le Peresetene o Bola Tinubu ma lona faletua o Oluremi na o la taliaina se valaaulia e avea ai ma malo faaaloalogia i le maota o le Tupu o Salesa i le aso 18-19 o le masina fou o Mati.
O asiasiga faapea ua ta’ua o state visits o se gaioiga e ta’ua e nisi e faaaogā ai tu ma aga o taligāmalo ma fesoota’iga e sana faamalosia ai sootaga ma paaga faavaomalo e tāua tele.
O le tausaga e 1989 le taimi mulimuli na alu ane ai se malaga faapea mai Nigeria i Peretania na malaga ane ai le ta’ita’i sa iai o Nigeria i lea taimi o General Ibrahim Babangida ma feiloa’i ma le Tupu Tama’ita’i ua tuumalo, o Kuini Elisapeta le II.
E fā asō o lea faigāmalaga.
O le tausaga na te’a nei 2025, e tolu malaga faalemalo sa talimalo ai Tupu Salesa, o le malaga a le Peresetene o Farani, Emmanuel Macron, le Peresetene o Amerika, Donald Trump ma le Peresetene o Siamani, Frank Walter Steinmeter.
E iai sootaga faaumiumi a Tupu Salesa ma Nigeria, o se atunuu o Malo o le Taupulega, e fiafia i le faaperetania ma musika faa-Nigeria o le afrobeats.
Puna o Faamatalaga: https://www.bbc.com/news/articles/cvg1g070zwlo
