O tagata Ausetalia e faigaluega atu mai le fale e tatau ona faaitiitia o latou totogi pe a fua i isi tagata faigaluega o loo tausavali i ofisa mo galuega, o le faamatalaga lea a se tasi sa avea muamua ma premier o Vitoria, Jeff Kennett.
Fai mai a ia o tagata o loo faigaluega atu i fale ua faasaoina a latou tupe mai feoaiga agai atu i fale faigaluega, o lona uiga la e tatau ona laiti atu o latou totogi.
O lona manatu o le a iai se feeseeseaiga i le mataupu lea aemaise ona sa mafua mai lea suiga i le taimi o le koviti.
Fai mai a ia e leai se faiā o lona manatu i le tulaga lea ma le aofai poo le tulaga foi o galuega faatino a tagata ae o le vaai i tupe faaalu ma le eseesega e fua iai se manatu faaalia.
O sea manatu ua faitioina e le toatele e pei ona molimauina e talafou, ua faailoa finagalo o nisi o sooupu o iuni o tagata faigaluega, e le ioeina lea tulaga ona o le tele o mafuaaga.
Fai mai nisi o le itu e ave iai le faatāua o le ituaiga galuega ma le tāua o le galuega o loo faatino e le tagata, o nisi ua faailoa o le itu tāua lea e ao ona mataitu e pulega o fale faigaluega, pe o faatino le galuega i se tulaga lelei afai o lea e tatau ona faaauau pea le auaunaga a le tagata faigaluega ae o loo tuuina atu ai foi ma se faamāmā avega mo ia aemaise nisi o fuafuaga tau le aiga e mafai ona faafaigofie ai.
O le tali a le faigamalo o iai nei i Vitoria i le mataupu lea e lē o fia taliaina ni fautuaga mai sē sa avea ma taitai o le Liberal talu ai ae pau le itu e faatāua o se avanoa e toe ave ane ai tagata faigaluega i ofisa.
