Ua tofia nei le afioga Faolotoi Reupena Pogi e avea o se sui auai o le Komiti Faafoe poo le South Seas Healthcare Trust Board.
O le afioga ia Faolotoi sa avea ma Konesula Aoao o Samoa i Aukilani mo le tele o tausaga mai le tausaga e 2009 se’ia faato’ā suia e le afioga ia Afemata Palusalue Faapo II i le tausaga e 2023.
O se tamalii ua lausilafia ma faaaloalogia i totonu o le komiuniti a Samoa e lē gata i Aotearoa Niu Sila ae faapea foi i Samoa, i ona uiga o le faimea tonu, agamalu, ma ua tele tausaga o lana tautua i tofiga o se ta’ita’i i totonu o galuega a le malo.
A o le’i tofia le afioga Faolotoi e avea ma Konesula o Samoa i Aukilani, e tele tausaga sa galue ai o se su’etusi sinia i le ofisa o le Su’etusi Sili a Samoa, sa ia tauaveina ai tofiga sinia i le itu o le ta’ita’iga o le ofisa, e aofia ai le galue o se Audit Consultant, Assistant Controller, ma le Chief Auditor.
Ma e mautinoa o le a tele le tomai ma le silafia o le a ia fesoasoani ai i le tulaga e lē gata i le ta’ita’iga, o le itu tau tupe ma le su’eina o tusi ina ia faamautinoa le manino ma le malamalama uma o na vaega eseese i le faatinoga o pisinisi.
Ua faaleoina le fiafia tele ma le talia lelei e le South Seas Healthcare o le see atu ai o le afioga Faolotoi i lea tofiga tāua i totonu o le latou faalapotopotoga.
