E fitu miliona valu selau afe tālā le fesoasoani a le malo o Iapani e tauala mai i le faigāpaaga ma le malo o Samoa, o le a fausia ai ni nofoaga e faapipii ai masini faaonaponei e aoina ai faamatalaga o le tau, ina ia mafai ona lagolago ai i le galuega a le ofisa o le tau o loo māta’itūina uiga fesuisuia’i o le tau auā tapenaga i taimi o mala faalenatura e pei o afā, lōlōga ma mafui’e.
O lea agalelei o Iapani na faamautū i se sainiga lima i le vaiaso ua mavae i le va o le sui o lea malo i Samoa ma le ta’ita’i o le tatou malo.
O le malae vaalele faavaomalo i Faleolo, Lufilufi, Le Mafa, Togitogiga, Manono, O Mauga Talu, Le Piu ma le malae vaalele i Maota i Savaii o le a fausia ai nofoaga, o le a iai ma masini faaonaponei e aoina ai faamatalaga o le tau.
