E sefululima masini e gaosi ai le kesi ogaumu e faaaogā i totonu o aiga ua faimeaalofa ai le malo o Isaraelu i le malo o Samoa e tauala atu lea i le Matāgaluega o Puna’oa Faalenatura ma le Si’osi’omaga.
O ia masini e ta’ua o homes biogas system e lē faaaogāina iai se eletise, ae maua le kesi ogaumu i le lafo iai o otaota lafoa’i mai le gasesega o taumafa ma isi otaota mai le si’osi’omaga faalenatura.
E faapala i lea masini ia otaota lafoa’i ona maua ai lea o le kesi e ola ai le ogaumu, ae mafai foi ona ola ai moli e faapitoa lava i le faaaogāina o le kesi ma ia masini.
O le tausaga e 2031 o loo taula’i iai fuafuaga a le malo o Samoa e tatau ona oo atu iai ua faaaogā malosi’aga faafouina e pei o kesi e maua mai ia masini mo le faaaogāina e o tatou tagata, ma i se faiga e sili ona malupuipuia ai le si’osi’omaga.
O le Minisita o lea matāgaluega le tofa Ale Vena Ale sa ia taliaina lea foa’i mai le malo o Isaraelu e pei ona sa malaga mai le Amepasa o lea malo mo Samoa e tauaao ona tusi taualoa o ona tofiga i le afioga i le Ao Mamalu o le Malo ma feiloa’i atu ai i le Palemia ma isi ta’ita’i o le malo o Samoa.
