O ananafi i le nofoaga e faatali ai nofoaafi i Ellerslie na lipotia mai le faafefe ai e se vaega o ni tagata se to’aono, se tama’ita’i ma fāoa ni ana meatotino, a o le’i sola ese lea tama’ita’i mai le nofoaga na faamata’uina ai o ia.
Ua avatu ai se talosaga a leoleo i lē na afaina ina ia oo ane e faailoa le mea tonu na tupu.
Ta’ua e Satini Tim Roberts, e tusa o le 2pm i le aoauli ananafi na vili ai leoleo e se tasi o le aufaigaluega a le Auckland Transport, na ia vaaia lea osofa’iga.
Na vaaia e lea sui o le AT nei tagata o taumafai e faafefe sia tama’ita’i, ma latou aveina ni ana meatotino, ma ia vaaia ai loa le tama’ita’i ua sola ese i ni foliga matuā mafatia.
Na mafai ona maua i meapu’eata i latou nei e to’aono a o aga’i atu i se nofoaafi e aga’i i Newmarket, ma e taunuu atu iai ua faatali mai leoleo ma loka mai ai loa.
Ua molia ai nei se isi tama’ita’i e 18 tausaga le matua, i le moliaga o le gaoi, ma o le asō lea na faatulaga e tula’i ai i luma o le Faamasinoga Faaitumalo a Aukilani.
O le isi to’alima na avatu i le vaega a le Police Youth Aid.
Ae o loo manana’o leoleo e fia talanoa atu i le tama’ita’i na afaina i lene’i osofa’iga, ina ia faamautinoa o okay o ia ma fia faailoa atu iai o loo iai isi fesoasoani e maua mo ia.
O le faamatalaina o lea tama’ita’i e faapea sa ia ofuina se ofu faipulou lanu efuefu, ma o loo tusia ai le Logo a le NASA i le pito i luma o le ofu.
Mo soo se tasi o silafia ni faamatalaga i lenei faalavelave, ua talosagaina e vili le 105 ma ta’u atu le numera o le case 260302/5584.
Puna o Faamatalaga: https://www.nzherald.co.nz/nz/auckland/ellerslie-train-station-aggravated-robbery-police-urge-victim-to-come-forward/FLVYPRXNVRA5DCFCRY3RVZBCG4/
