Saunoa le Palemia o Niu Sila, Christopher Luxon e lalago le tulaga e tu ai Niu Sila i le tulaga o Ausetalia, e tusa o le gaioiga na tu’i pomu ai e Amerika ma Isaraelu le atunuu o Iran, ma ua fasiotia ai lo latou ta’ita’i sili.
Na mua’i faaleo se manatu o le Palemia o Ausetalia, Anthony Albanese, e lagolagoina e Ausetalia le osofa’iga na faia e le Iunaite Setete ina ia taofia ai le faaaogāina e Iran o ana meatau faaniukilia.
O le Aso Sa na faia ai se faamatalaga a Luxon ma le Minisita o le Va i Fafo, Winston Peters ma la faailoa ai osofa’iga na faia e Amerika ma Isaraelu.
Ina ua fesiliga e le Morning Report pe na te lagolagoina osofa’iga, e le’i tali sa’o lava Luxon, ae na ia ta’ua e na te teena le gaioiga a Iran na fai o se gaioiga leaga ua ma’umau ai le tele o soifua.
Saunoa Luxon, ua leva ona faapologa e Iran ona lava tagata, ma e manatu o Iran foi na lagolagoina faalapotopotoga faatupu faalavelave, ma e malamalama lelei i le māfua’aga ua faatino ai e Amerika ma Isaraelu lea osofa’iga, ina ia faamautinoa e lē mafai e Iran ona latou faamata’uina tagata.
Ina ua fesiliga Luxon pe o ogatusa ma le tulafono osofa’iga na faia, ae na tali Luxon, o le tuu atu pea ia Amerika ma Isaraelu e faamatala e latou le faavae faaletulafono mo a latou osofa’iga.
Ae mo lē na avea ma Palemia o Niu Sila talu ai, Helen Clark, fai mai a ia, e matuā matagā le tulaga o loo tu ai le malo o Niu Sila i lenei faalavelave; fai mai Clark, sa tatau ia Niu Sila ona lagolago i poloa’iga faavaomalo e faavae mai luga o tulafono (rules-based international order).
Ae fai mai Luxon o le mea e matuā matagā o gaioiga faapologa a Iran sa faia ma fasiotia ai le faitau afe o ona lava tagata lea na oo ai ina savavali tagata i magāala ma alalaga mo so latou sa’olotoga.
O le tula’i mai o nei fetaua’iga ua lagonaina i itu e fia o le lalolagi, ma e tele aafiaga ua oo ai ina ua amata ona tapunipuni fesoota’iga ma isi atunuu tetele i o latou malae vaalele ona o le faafefe mai o osofa’iga o loo folafola e itu e lua.
O le a tulimata’i pea le faagasologa o nei feteena’iga ma se aafiaga pe ono oo mai i lenei itu o le lalolagi.
Puna o Faamatalaga: https://www.rnz.co.nz/news/political/588357/luxon-says-nz-s-position-the-same-as-australia-on-iran-attacks
