O le tama’ita’i tausi soifua sa galue i le falema’i i Middlemore, lea na mulimuli atu foi i lona to’alua i o la faasalaga faafalepuipui, ina ua faamaonia o la moliaga o le auai i se faufauga tele e la’u mai ai fuālaau faasāina i totonu o le atunuu, o lea ua faailoa faalaua’itele lona suafa ina ua lē toe manuia lana finauga faaumiumi sa fai ina ia taofia le faailoa o lona suafa.
O le tinā ia Ma’ata Vi, e 38 tausaga o lona soifua, ma e to’atolu lana fanau.
O le masina o Iuni o le tausaga talu ai 2025, na lau ai lona faasalaga, e fā tausaga ma masina e lima i le falepuipui, ina ua ioe i ona moliaga ia Novema o le 2024, o le aumaia faananā o le ‘aisa poo le methamphetamine, ma moliaga e 15 o le aumai o tupe palapalā poo tupe e maua mai gaioiga faasolitulafono.
O Ma’ata ma lona to’alua le tamaloa o Samiuela Kuki, na aofia i la’ua i tagata e to’a 30 na loka ma taofia mai e leoleo i se latou osofa’iga i le tausaga e 2021, na faai’u iai se su’esu’ega a leoleo ua leva ona faagasolo e ta’ua o le Operation Worthington.
Ina ua lau le faasalaga o Ma’ata i le tausaga talu ai i le Faamasinoga Faaitumalo a Aukilani, na ta’ua e Judge Claire Ryan le tele o ni tusi na tuuina atu e lagolago mo le tinā na molia.
Ae na saunoa le faamasino a o le’i faalau mai le faasalaga, ‘o Ma’ata o se tinā e galue malosi mo lona aiga, ma o se tausi soifua e galue mamafa, ae o le ogaoga lena o lenei solitulafono na ia faia, ua matuā melea uma ai e ia na uiga lelei uma sa ia te ia.
