O le ulugalii Aukilani e lauiloa ia pisinisi fai fale’aiga, ua poloka ai nei i Dubai a o lipotia mai le tapunia ai o malae vaalele i lea atunuu ona o lamatiaga i fetaua’iga o loo felelei solo ai pomu i luga o le ea i le taua a Amerika, Isaraelu ma le malo o Iran.
O Sid ma Chand Sahrawat o loo i Dubai mo a la galuega, ma sa tatau ona felelei ese mai Dubai i le Aso Gafua, o ananafi lea, ina ia amata le la taamilosaga sa fuafua e faasolo i totonu o Initia e sa’ili’ili ma faata’ita’i ituaiga o tofo o kuka eseese.
Ta’ua e Chand, na la maua se text faailoilo i le vaeluaga o le po o le Aso Sa, mulimuli ane na la faalogoina loa le pā pā o pomu.
E malama ane le taeao ae maua le tala, ua faaleagaina le malae vaalele i pomu.
Fai mai Sid, e iai foi se isi faletalimalo i le aai na lipotia ane ua faatama’ia foi i le pomu ma o se vaaiga e matuā fefefe ai.
Faailoa e lenei ulugalii Niu Sila, ua tele ina leai nisi e feoa’i i luga o auala, ona ua nonofo le to’atele o tagata i totonu o latou fale.
O se taimi muamua lenei ua feagai ai lenei ulugalii ma se vaaiga faapea ua matuā tapuni atoa se atunuu ona se taua.
Ua uma ona lesitala atu faamaumauga o lenei ulugalii i le upega tafa’ilagi a le malo Niu Sila, le SafeTravel website, ae i le taimi o lenei lipoti, e le’i maua ane se la fesoota’iga tuusa’o ma sui o le ofisa.
E faigatā ona latou maua ni faamatalaga maufaatuatuaina ona e laitiiti le gagana Peretania e faaaogā i tala i vaifanua a le atunuu, o lea e tele ina la faalagolago i lipoti atu i isi atunuu ma lipoti i luga o le upega tafa’ilagi.
O le popolega i sia ulugalii Niu Sila, e lē o iloa poo afea se taimi e mafai ai ona toe oese mai.
O loo iinei pea le fanau a lenei ulugalii, ma na ta’ua e Chand Sahrawat le faigatā tele o le taumafai e faamalamalama mai i si a la fanau le tulaga o loo iai.
Ae mo le taimi nei, o le a la faatalitali ai pea i Dubai se’ia oo ina toe amata ona felelei vaalele, auā o loo faapena foi ona tapuni malae vaalele i isi atunuu tuaoi.
Puna o Faamatalaga: https://www.rnz.co.nz/news/national/588316/iran-strikes-we-don-t-know-when-we-can-leave-kiwi-restaurateurs-trapped-in-dubai
