Na faate’ia tagata i le faaitu i Papakura i le taeao o le Aso Toona’i talu ai ua aga’i i le vaeluaga o le aso, ina ua lolofi atu taavale a leoleo, o taavale a le St John faapea le faapepepepe ane o le Eagle helicopter ma amata si’osi’omia ai le Clevedon Rd ma le Grove Rd.
Na ta’ua e se sui sooupu a leoleo, na latou faalogoina le pā pā o laaumalosi i le tusa o le 11.20am i le taeao i Clevedon Rd, ma e le’i umi ona taamilo leoleo ae maua ai loa se tagata o loo faamanu’alia mai se laaumalosi.
Na faavave atu lena tagata i le falema’i i Middlemore a o faaauau pea ona faataamilo leoleo faa’au’upegaina i lea vaipanoa mo le sa’ilia o le isi tagata sa ia tauaveina se laaumalosi.
E talitonu leoleo, o lē na aafia ma lē na faia le faaoogamanu’a e masani i la’ua, ma sa taumafai ai leoleo e faailoa ane i le mamalu o le atunuu lautele, e lē o iai se tulaga lamatia mo tagata lautele.
Na faatalosaga ane ai foi leoleo i le mamalu o le atunuu e ono silafia ni faamatalaga i lenei faalavelave ina ia fesoota’i atu i leoleo i le numera 105.
Puna o Faamatalaga: https://www.rnz.co.nz/news/national/588280/police-continue-to-investigate-after-papakura-shooting-leaves-man-in-moderate-condition
