E to’atolu ofisa sinia o le navy poo senior Royal New Zealand Navy officers ua fesaga’i nei ma moliaga o le a tutula’i ai luma o le faamasinoga faafitafita, i o latou moliaga e fesoota’i atu i le manuao a Niu Sila, le HMNZS Manawanui lea na oso i luga o le aau i gataifale o Samoa.
O nei moliaga ua faia e tusa ai ma le tulafono, Armed Forces Discipline Act 1971, o loo faasino atu i mea sesē na tutupu i luga o le manuao i le afiafi o le aso 5 o Oketopa 2024, ma i’u ai ina goto ifo i gataifale o le afio’aga o Tafitoala i le motu o Upolu.
O i latou nei e aofia ai tama’ita’i na kapeteni, Commander Yvonne Gray, Lieutenant Commander Matthew Gajzago ma le isi ofisa sinia e to’atolu iai latou.
O le manuao lea na pa’ulia i le aau ma goto ifo ai i le ilititai, ma masaa ai le faitau fia selau lita o le tiso ma le suāuu i le sami.
O moliaga o le faatamala ma le faatalalē (negligent) ua māfua ai ona faaletonu le vaa, ma le lē faatinoa o gaioiga sa tatau ona faia ae ua tuulafoa’i le vaa e faaletonu.
Afai ae faamaonia nei moliaga, e oo atu le maualuga o le faasalaga i le lua tausaga i le falepuipui.
Na ta’ua e se sooupu mo le vaega a le puipuiga, e le’i faatulaga maia i le taimi nei, le aso ma le nofoaga o le a faia ai le faamasinoga faafitafita o i latou nei.
Puna o Faamatalaga: https://www.rnz.co.nz/news/national/588412/naval-officers-face-charges-over-sinking-of-hmnzs-manawanui
