O le itumalo o Aana Alofi 2 lea e iai le afio’aga o Fasitoouta, ma ona pitonuu e aofia ai Matailiili, Sailoa, Avano ma Satui, o le Aso Toona’i na te’a nei na amata ai le latou tufatufaga o le ta’i 150 tālā o le polokalame a le malo o le toe a’e o a’oga poo le back to school.
O le aso 28 o Fepuari sa faatulaga e amata tufatufa ai lea fesoasoani e komiti o Fono Faavae ona sa iai le taofiga e faatali se’i mae’a palota laiti sa faia i le Aso Faraile ua mavae.
O nisi o Fono Faavae o loo faamautū faamaumauga e ala i le faia o lesitala o tagata uma e lē o lavea ia i latou o loo lesitala i lola palota, e faapitoa lea ia i latou e i lalo o le 21 tausaga le matutua aemaise lava i pepe ma fanauiti.
O le galuega o loo faatino ai le tufaina o lea fesoasoani tupe mai seleni o le poloketi miliona tālā o loo mata’alia ai ta’ita’ifono ma latou komiti ina ia mautinoa e leai se tagata e maua faalua lana 150 tālā.
