O ananafi i le latalata i le 4pm i le afiafi na tula’i mai ai foi se isi faalavelave o se mū ina ua sasao se afi i se pasi a’oga e latalata i le fetaula’iga ala i le Carter Rd, i le itu i saute o le taulaga o Mangawhai.
O se pasi e feavea’i ai fanau a’oga mai Northland, ma o le taimi ua tuua a’oga ma ua aga’i atu e momoli fanau i o latou aiga ae faafuase’i ai ona sasao ane le afi mai ai le faalavelave.
I lipoti mai le NZ Herald, e to’a 19 fanau a’oga sa i totonu o le pasi ma le avepasi e to’a 20 ai latou, ma sa mafai ona faasaoina uma o latou soifua.
E le’i mafai ona matala le faitoto’a autū e oese mai ai i fafo tamaiti a’oga, ona taumafai ai lea o le avepasi ina ia faaui ese uma atu i lana itu.
O se itu na faaalia ai le popolega o se tasi o tamā o se teineitiiti a’oga na iai i le pasi.
Fai mai lea tamā, e tatau ona iai se isi faitotoa poo se vaega o le pasi e faatulaga mo taimi o faalavelave faafuase’i faapea, pe afai ae ua lē mafai ona uia faitoto’a autū o le pasi, ae ia iai se isi vaega ua faatulaga ai se auala e sao ai i fafo le pasese.
O loo ta’ua e foliga o se faafitauli tau le afi o le pasi (mechanical issue), ae o loo faagasolo su’esu’ega i lenei faalavelave.
