E 125 a’oga amata poo pre-schools i Samoa atoa o loo a’oa’oina ai le 8 pasene o fanauiti a le atunuu poo se aofa’iga e tusa ma le 5,165.
O le laasaga muamua lea o le olaga a’oa’oina o fanauiti o a’oga amata e faafailele mai ai a o le’i ulufale i a’oga tulagalua ma faasolo ai i kolisi ma a’oga maualuluga.
Ua faaalia le faafetai o le Pelesetene o le sosaiete o a’oga amata i Samoa i le foa’i mai le UNESCO ma nisi o paaga e aofia ai le malo o Ausetalia, o le a maua ai se isi tupe e atina’e ai a’oga amata, o a’oga tulagalua, a’oga maualuluga poo secondary schools ma a’oga faamatātā eseese.
E 2 tesimale 5 miliona tālā tupe Amerika lea foa’i poo se grant e tusa e maua ai le 6 miliona tālā Samoa, o le a faasoa mai i totonu o le fā tausaga.
O le autū o lea fesoasoani a mauaa faavae o atata lelei na o a taeao.
Ua talitonu le Pelesetene o le sosaiete o a’oga amata i Samoa le faletua o Kuinimeri Tamati, e tāua le fesoasoani ua maua, ae mo a’oga amata lava ia e telē se mana’oga o loo iai mo le faaleleia o le a’oa’oina o fanauiti.
O fesoasoani foi o loo maua atu i le malo e lē o lava.
Se faatalanoaga ma le Pelesetene o le sosaiete o a’oga faata’ita’i poo a’oga amata i Samoa, le faletua o Kuinimeri Tamati.
O le Aso Lua o le vaiaso nei na faalauiloa ai le fesoasoani o le a galulue ai le UNESCO ma ana paaga faapea le Matāgaluega o A’oga ma Aganuu.
