O le asō lea na faasilasila aloa’ia mai ai e le alii Palemia, Christopher Luxon le mafai ai ona nei ona taaalo tama Niu Sila i ‘au a Kuiniselani poo Niu Sa Uelese i le taamilosaga o le State of Origin talu ai ua iai nisi o suiga i agavaa e mafai ai ona taaalo nisi i lea taamilosaga sa masani e na o tama lava i Ausetalia e agavaa ai.
O le sau ai o lenei faasilasilaga ina ua uma ona faamautinoa o le a talimalo Aukilani i se taaloga a le State of Origin i le tausaga fou 2027.
Lona uiga o lenei suiga, e soo se tama taalo lakapi liki e ausia agavaa e mafai ai ona taalo i le Origin, e mafai ona taalo e tusa lava poo fea le atunuu lea e taalo ai.
O lena suiga ua mafai ai e tama o loo taaalo mo Egelani ma Niu Sila ona ofu le jersey Moana poo le Maroon mo le taamilosaga.
O agavaa autū lava o loo tumau e pei o nei:
- O le tama taalo na fanau i Niu Sa Uelese poo Kuiniselani.
- O le tama taalo sa nofo i Niu Sa Uelese poo Kuiniselani a o le’i atoa le 13 o ona tausaga.
- O le tama taalo sa taalo foi lona tamā i le State of Origin ma e tatau ona faailoa le ‘au na tatalo ai.
Saunoa le ta’ita’ifono o le Komisi o le Lakapi Liki a Ausetalia, Peter V’landys, ua oo i le taimi ua mana’omia ona fai ni suiga e lelei mo le taaloga, ona ua faatupula’ia le taaloga faavaomalo ma e ao ai ona atagia atu ia tatou tulafono na suiga.
Fai mai le ta’ita’ifono, e lē fetaui le agavaa o le tama e taalo i le State of Origin ae e lē o mafai ona faataaloa ona e faapea o loo taalo mo se isi atunuu e pei o Niu Sila poo Egelani i taaloga faitaulia.
O le agaga moni o lenei taamilosaga, ia e taalo mo le setete e te sau ai ma ua e agavaa e te taalo ai.
Saunoa V’landys, e iai le faamoemoe o lenei suiga o le a fesoasoani e faatuputupula’ia ai le taaloga i le tulaga faavaomalo ma le State of Origin.
Puna o Faamatalaga: https://www.nzherald.co.nz/sport/rugby-league/state-of-origin-eligibility-changes-open-door-for-kiwi-league-stars/7BJK3PXDRVGUDGFYQKR5QXDVVQ/
