Ua iu lava ina maliu si tina matua e 95 tausaga lea na lipotia le faaaoga ai e leoleo o le taser i le fitu aso talu ai ina ua agai atu e faafilemu le tina i se nofoaga o tagata matutua i le Snowy Mountains i Niu Sa Uelese.

O Clare Nowland le suafa o le tina na maliu i le ta o le fitu i le afiafi ananafi i le falemai i Cooma a o iai uma si ona aiga.

Ua atoa le vaiaso o tulituliloa pea e tagata le mataupu lenei talu ona muai lipotia mai, faapea na agai atu leoleo e tali i le valaau mo se fesoasoani i le nofoaga lea ina ua faigata ona faafilemu le tina matua ma sa iai se tamai naifi ua fiu e tau aveese.

O le faaiuga o le mataupu na faaaoga e leoleo le taser i le tina matua ma iu ina pa’ū ai ma aafia lona ulu, taofia ai i le falemai i le vaiaso atoa ma iu ai ina maliu i le afiafi ananafi.

O le taimi nei e 3 moliaga ua faia i le leoleo o loo aofia i le mataupu ma e tulai i le faamasinoga i le aso 5 o Iulai ma ua faamalolo le tumau mai lana galuega.

Ua faaoo faamaisega a le atunuu i le aiga o si tina matua fai mai e masani ona volunteer i faalapotopotoga tau fesoasoani i le latou pitonuu ma o se totino foi o le Ekalesia Katoliko i lea faaitu.