O le nofoaga tutotonu o tu ma aganuu faa-Samoa i Malifa o le a faalauiloa ai i le Aso Toonai le faaiuga o lenei vaiaso tomai ma agavaa o tamaitai Samoa aemaise o lo latou soifua atia’e i soo se auaunaga ma pisinisi ua latou umia.
Ua faaigoaina lea faamoemoe o le Anofale o se tapenaga a le Onomea Productions lea ua na faatautaia tapenaga uma mo le sailia o se Tausala o Samoa.
O nisi o tamaitai sa faapaleina i le tausala o le atunuu faapea foi le pale o le Pasefika o le a faalauiloa i lea faamoemoe o latou tomai ma agavaa ma faamanuiaga ua latou selesele iai, i le itu i pisinisi.
O nisi foi o tina ua iloga le latou tautua i auaunaga eseese e pei o tagata tafafao o le a faailoa ai foi o latou faiva faataitai.
Ua faamautu mai le auai i lea faaaliga o le uluai tausala o Samoa na muai pale i le Tausala o le Pasefika i Saute i le tausaga e 1996, le susuga Seiuli Verona Tapu Ah Ching Parker, ma nisi o Tausala o Samoa i le tausaga e 1994 ma le 1999.
O se tasi lea o tapenaga a le Onomea Productions a o loma le tauvaga o le sailia o se Tausala o Samoa ia Setema o le tausaga nei.
O se tasi o faalauiloa o le Onomea i luga o upega tafailagi e pei ona lagolagoina e le kamupani telefoni feaveai o le Digicel.
