Ua fā ai nei tausaga o le faigapaaga a le Lakapi Samoa ma le Matagaluega o Tina ma Tamaitai, Aganuu ma Agafesootai e lagolagoina ai polokalame ma atina’e faagasolo a le matagaluega.
O se tasi o nei polokalame e aofia ai le Maluifale, o se faalauiloa a le Matagaluega ina ia tutu faatasi e taofia sauaga i totonu o le atunuu.
I upega o faamatalaga a le Matagaluega na asia ai e le Manu Samoa ma lana pulega ofisa a le Matagaluega.
O le faalauiloa aloaia o lenei polokalame i le tausaga ua mavae e pei ona faaalia e le Minisita, Leota Laki Lamositele le afuaga ma le faamoemoe o le faamamaluina ai o le laeina o le lanu uliuli i Aso Tofi taitasi ina ia faailoa ai le naunautaiga i lenei faafitauli o loo alia’e mai pea i nisi o aiga i le atunuu.
Na tuuina aloaia ai se togiga ua mae’a tapena e le Matagaluega mo le’ au e fesoasoani ai i le faalauiloa atu o le taofia ai o sauaga i soo se tafa o le lalolagi.
Na momoli ai foi faamanuiaga a le Matagaluega i le Manu Samoa a o tapena ai mo lana taaloga ma le ‘au a Fiti i le aso a taeao.
