O le tetele o timuga malolosi i faaitu i le pito i lalo o le motu nei i Mātū o le atunuu, ua lipotia mai e le Powerco poo le vaega o loo sapalai mai ai le eletise i ia faaitu o le atunuu, le motusia ai o le eletise i le tusa ma le 23,000 fale o aiga ma isi nofoaga o loo faaaogāina le eletise, ae tusa ma le 10,000 aiga i Ueligitone na faapena foi ona motusia a latou eletise.
Ua aumai ai ma ni lapata’iga i gaioiga e ao ona fai pe a motusia faafuase’i le eletise, ina ia saogalemu le soifua, ma ia maua pea e lou aiga le mafanafana i totonu o fale ma puipuia mai ai foi meatotino mai le faaleagaina.
Muamua a pē le paoa faatalitali tēisi se’i vaai pe toe vave ona ola; afai ua fai si umi e le’i ola mai lava le paoa, vili loa le kamupani o loo galulue i laina eletise.
Siaki foi i le upega tafa’ilagi poo luga i le social media a lau kamupani paoa, pe lē o iai ni vaega na mua’i fuafua ai le tapē o le paoa ma iloa ai poo iai se taimi o faailoa ane e toe ola ai le paoa.
E ono faaaogā ai lau telefoni feavea’i i nei fesoota’iga auā atonu ua pe le wifi ma le initaneti.
Afai e iai se afaina o lou soifua mālōlōina i le motusia o le eletise, e lelei pe a vili le 111 poo lou aga’i i le falema’i.
O taimi e pē ai le paoa, e lelei le faaaogā o se moliuila faamaa nai lo le faaaogā o le moli o lau telefoni feavea’i, ne’i vave ona pe ai le maa o le telefoni ae faigata ona toe maua se eletise e fafaga ai.
Tapē uma ki o le paoa o au masini alu i le eletise ona e ono pā pā ma faaleagaina ai pe a faafuase’i ona toe ola malosi mai le eletise.
Aumai foi le fautuaga mai le Vector, ina ia faamautinoa ua tapē uma ki o au ogaumu ma masini heaters o le fale, ina ia mautinoa e lē toe ola mai le paoa ma ola ai loa na masini e aunoa ma lou iloa.
E fautuaina e lelei pe a faaola pea le ki o se moli ina ia mafai ona e iloa le taimi e toe ola mai ai le paoa.
Mo mea’ai o loo i le pusaaisa, e mafai lava ona lelei mo se taimi umi na meaai pe afai o loo mau lelei ona tapuni.
Aua le toe tatala sooa le pusaaisa ne’i alu i totonu le ea mafanafana, auā a umi o pē le paoa, o le a lē toe umi ai foi ona mālūlū meaai o loo iai i totonu, ae ave muamua i fafo meaai e te silafia o le a vave ona faaaogā ina ia lē tatala sooa ai le pusaaisa.
E fautuaina foi le vave ona faaaogā muamua meaai ua latalata le taimi e uma ai le aogā e pei o falaoa, ma aano o manufasi ae tuu mea’ai tuuapa e faaaogā mulimuli.
Afai e mālūlū aso, ia toso pea iefaamalama ma tapunipuni faamalama e taofi ai le mafanafana i totonu o le fale.
Faaaogā ogaumu mo tolauapiga, e faapuna ai vaiinu ma utu fagu e teu ai; ia manatua aua ne’i tutuina na ogaumu i totonu o se fale; e tatau ona tutu i fafo i le taalaelae.
Aua foi ne’i galo lou siaki atu i nai ou tuaoi poo ā mai latou, aemaise lava nai aiga o loo iai tuaa matutua e lē faigofie mo latou taimi faapenei.
Ae o le fautuaga tāua mai le vaega a le NEMA poo le National Emergency Management Agency, manatua ia faamaa fou lau leitio ina ia ola lelei mo lou silafia o ni faamatalaga uma aemaise lapata’iga o loo faasilasila mai lea taimi i lea taimi, auā le nofo saogalemu o tagata uma.
Puna o Faamatalaga: https://www.rnz.co.nz/news/national/586967/power-outages-what-to-do-and-what-not-to-do-when-the-electricity-goes-out
