O loo finauina i le faamasinoga i Kalaiesetete se mataupu a se ulugalii na la mauaina se vaega tupe tele e $200,000 o nanā i luga o le fa’alo o le la fale.
O loo taofia le faailoaina faalaua’itele o igoa o lenei ulugalii, ae ta’ua i le lipoti, na la maua le tupe o fafao i totonu o ni piliki uga ona sulu lea i totonu o le insulation i le fa’alo o le la fale i le tausaga e 2021.
Na lipoti e le ulugalii lenei tupe i leoleo ma faailoa atu ai e leoleo ia la’ua e tatau ona toe faafoi atu lenei tupe auā o se tupe na maua i ni faiga faasolitulafono, atonu o ni faatauga fualaau faasāina.
O le finau a le ulugalii e tauala i le la loia, Mike Lennard, i luma o le Faamasinoga Maualuga i le Aso Gafua, e tatau ona tuu pea ia la’ua le tupe auā e la te le’i faatinoa se soligatulafono na maua mai ai lenei tupe.
Fai mai le loia a le ulugalii, o le mea e tupu i nisi tagata o le a latou maua foi ni tupe faapea, e oo ane le manatu, aua le lipotia fua pe toe faafoi tupe i leoleo, ae aga’i loa latou e faaaogā.
Ae o le finau a le loia a leoleo, Klaudia Courteney, o le tupe lea na maua e le ulugalii, ua pisipisia i faiga faasolitulafono.
E ese mai pe a maua e se tagata se atotupe i luga o le auala ma tuu atu i leoleo, ma afai e uma ane e leai se isi e oo atu e ave lea atotupe, ona ave loa lea o le tupe mo le tagata na mauaina le ato.
Saunoa Courteney, na māfua ona vave faailoa e le ulugalii le tupe i leoleo, ona sa la iloa o se tupe mai se gaioiga faasolitulafono, ma sa la popole mo lo la saogalemu, ne’i afea lo la fale e se tasi o taumafai e sa’ili atu lenei tupe.
Na ta’ua e le faamasino, Justice Osborne, e iai nisi atunuu afai na maua e tagata ni tupe faapea mai ni faiga faasolitulafono, e toe faafoi i tagata se pasene o na tupe.
Auā ana faapea e lē faafoia e tagata le tupe i leoleo, semanū e lē maua lava e leoleo na tupe.
O loo faaleoleo mo le taimi nei se faai’uga a le Faamasino.
Puna o Faamatalaga: https://www.odt.co.nz/star-news/star-christchurch/couple-fight-keep-200k-found-their-ceiling-rnz
