O le siitia o le tau o taumafa ua iu ina vaaia ai le tele o aiga o feagai ma faigata pei ona taua e se tasi o faalapotopotoga ma lipotia I le televise a Niu Sila. O faamaumauga aupito lata mai ua iloa ai o le tau o taumafa ua siitia I le 7.6 pasene ile masina o Mati faatusa I le taimi lea I le tausaga talu ai, ma o se siitaga tele lea ua faamauina mo se taimi umi.
O le tau o fualaau aina ma fualaau taumafa mata ua 18 pasene ua maualuga ai. O se tasi o faalapotopotoga ale komiuniti e ofoina fautuaga faatatau I tulaga e faasaoina ai seleni, ua taua ua feagai nei ma talosaga mo fesoasoani mai aiga pagatia ona o le siitia o le tau o oloa.
Saunoa le ofisa sili o le Nga Tangata Microfinance o Natalie Vincent e faapea o le siitia ole tau o le soifuaga ua mafua ai le tele o talosaga mo ni nonogatupe ma ua faigata lava ona gafatia e tagata le soifuaga I tupe o loo maua.
Taua e Natalie e foliga ua fou ituaiga clients ua feagai nei ma latou ile taimi nei, o tagata ua agai e saili aitalafu ina ia soifua ai. Taua foi I le lipoti se finagalo faaalia o le minisita o Tupe, Grant Robertson e faapea o le siitaga o le tau o taumafa o se faafitauli lea o loo feagai ma le lalolagi ma e iai sootaga ona o le sapalai o oloa ma isi mafuaaga e pei o le tapunia o uafu I Saina, o se tulaga e le mafai ona ia faatonutonuina.
