Ua matuai faanoanoa sui o le Dandenong Ranges lawn bowling club ina ua lusi le silia ma le 100 afe o le latou tupe ona o ni faiga taufaasese.

O le au taufaavalea poo hackers sa o latou faaaogaina le imeli a le kalapu ma sui le kopi o le invoice mo le totogiina o ni galuega lipea na faia ma tuu iai se isi tusitupe fou e faaalu agai iai le tupe o le totogi o lea galuega ma o latou mauaina ai. 

O le failautusi o le kalapu o Les Lane sa ia faamatala ma le faanoanoa i le 9News e leai ma se avanoa se’i ona iloaina ai le eseesega o faamaumauga sa tuuina atu.

E 119 afe le vaegatupe ua lusi ua alu uma i le account fou lea na tuu atu e le au taufaasese ae emo ane le ata ua toe totogi uma e sui o le kalapu le galuega na faia mai tupe sa teu poo le savings ae ua alu le vaegatupe tele lea i le au taufaavalea.

Ona e le o mafai ona fesoasoani le faletupe i le kalapu e pei na faailoa ae ua faatuina e le kalapu se go fund me page e toe maua ai le latou tupe ua ma’umau.