Ua faamautinoa mai e le Malo, o le a faia se su’esu’ega faapitoa i le faalavelave lea na tula’i mai le masina talu ai aso 22 o Ianuari, le eleele solo i se vaega o le Mount Maunganui i Bay of Plenty, ma maliliu ai tagata e to’aono.
O le taeao lava foi lena na toe tula’i mai ai foi se isi eleele solo na taomia ai se fale i Papamoa ma e to’alua na maliliu ai.
Saunoa le minisita lagolago o le Emergency Management, Chris Penk i se faatalanoaga ma le RNZ, o lea ua malie le Kapeneta e faia se su’esu’ega faapitoa i nei faalavelave uma e lua.
Saunoa Penk, e manino mai, o loo fia malamalama i latou uma ua aafia ma maliliu o latou tagata mai nei eleele solo faapea foi tagata uma o le komiuniti, pe na faapefea ona tutupu nei mea, ae pe faamata sa iai ni mea na tatau ona fai ina ia taofia ai le tutupu o nei eleele solo.
O le isi la sitepu lea o le a sosoo e pei ona saunoa Penk, o le a tuuina atu i le Kapeneta se pepa o faamatalaga auiliili uma, e faatulaga atu ai le telē o le galuega o le a aga’i iai su’esu’ega, o aiaiga o le a faatulaga aga’i iai, o le paketi poo le vaega tupe o le a faaaluina ai, ae o ai foi o le a tofia e ta’ita’ia lenei su’esu’ega faapitoa.
O i latou o le a faatinoa lenei su’esu’ega e tatau ona fesoota’i atu i a’iga o i latou ua maliliu e faailoa iai le faagasologa o le faagasolo ai le su’esu’ega, ma e talosia o le a maua mai lenei su’esu’ega tali uma o loo fia iloa mai nei faalavelave.
Ua amata foi e le Pulega o le Aai o Tauranga sana ia lava su’esu’ega tuma’oti, o loo taula’i atu i isi uma mea na tutupu muamua atu se’ia oo ane i le taimi na solo ai nei eleele.
Puna o Faamatalaga: https://www.rnz.co.nz/news/top/586651/government-launches-inquiry-into-deadly-mount-maunganui-landslide
