O le asō i Samoa lea na faasalalau tuusa’o mai ai le sauniga aloa’ia o le faatautōina o lē ua tofia nei i se tasi o tofiga taualoa a le faigāmalo e avea ma Loia Sili a le atunuu.
O le tama’ita’i loia, le afioga ia Salā, Mauga Precious Chang ua tofia nei e tauaveina lenei tofiga tāua, ma e tusa ai ma faiga faavae o lenei tofiga, e 3 tausaga e tauave ai.
O lenei tofiga Loia Sili o lea sa tauaveina e le isi foi alo tama’ita’i o le atunuu, le Susuga Su’a Hellene Wallwork-Lamb, ae na faai’u le konekarate a Su’a i le aso 13 o Ianuari o le tausaga lenei 2026, ma tofia ai le tama’ita’i o Precious e tauaveina lē tumau le tofiga o le Loia Sili se’ia oo mai i le asō lea ua faamautū ai nei lona tofiga Loia Sili, i le sauniga o le faatautoga na faatino i le maota o lana afioga i le Ao Mamalu o le Malo i Vailele.
Ata: Radio Samoa/Lilomaiava Maina Misa
O le tama’ita’i Loia Sili na faau’u mai i ona faailoga o le Bachelor of Laws ma le Bachelor of Commerce mai le Victoria University i Ueligitone i Niu Sila, ma ua silia ma le 15 tausaga talu ona tautua o se loia i totonu o le atunuu.
E to’atele na auai atu i lenei sauniga o le faatautoga, o lana afioga i le Ao Mamalu o le Malo, o sui e to’alua o le Fono a Sui Tofia, le afioga i le Fofoga Fetalai, le afioga i le Palemia, o le Kapeneta ma sui o le Palemene, o sui o le sosaiete a loia Samoa, o aiga o le tama’ita’i Loia Sili, o uo ma paaga aemaise foi le tapuaiga a ona afio’aga.
O le afioga i le Loia Sili o se alo tama’ita’i e faasino i le afioga Siliniu Lina Chang, o se tasi foi o tinā ua iloga lona sao ia Samoa i lana tautua i fanau ma soo se tasi ua afaina i sauāga i totonu o aiga, e pei ona faauluulu ia te ia le faalapotopotoga o le Toomaga mo ē Puapuagatia poo le Samoa Victim Support.
Puna o Faamatalaga: https://www.facebook.com/samoagovt/videos/1178396241036484
