E fitu masina le matua o se pepe na fano le ola i le amataga o le vaiaso nei i āuga o le faama’i o le fiva o ponaivi poo le dengue fever.
Ua faaopoopo ai le numela o tagata i lo tatou atunuu ua fano soifua i lea faama’i e pei ona faailoa i faamaumauga a le matāgaluega o le soifua mālōlōina ua to’avalu.
O Aperila o le tausaga ua mavae na amata pesia ai le atunuu i le fiva o ponaivi ae peita’i ua mātauina e le soifua mālōlōina i le mae’a ai o le masina o Ianuari o lenei tausaga ua toe siitia le aofa’i o gasegase e lipotia atu mai falema’i i tua ma le maota gasegase autū i Motootua ua maua i āuga o le fiva o ponaivi.
Ua aumai faalaua’itele ai nei se fautuaga mai le matagaluega o le soifua mālōlōina i lo tatou atunuu ua toe logoina ai i auala o puipuiga o le fiva o ponaivi poo le dengue fever.
O puipuiga e pei o le faamamā o nofoaga o loo to’a ai le suāvai e tautuufua ai namu e feavea’iina le vairusi o le faama’i.
O laei foi ia lelei e puipui ai le tino mai le u e namu ma faaaogā ta’inamu e momoe ai, faapea vailaau o loo maua i faletalavai e fana ai le tino ina ia lē uina ai se tagata e namu.
O nofoaga o le itumalo o Vaimauga o Faleata aga’i i Sagaga i Upolu o loo tele ina faamautū ai tagata o loo aafia i āuga o le faama’i, a o Savaii o Faasaleleaga atoa e oo i Palauli.
