Ua faate’ia ma lagona le faanoanoa o se aiga Tonga lea e iai si a latou tamaitiiti e lua tausaga, ona o lea ua sau le faai’uga mai le Immigration New Zealand ua lē talia lona visa e toe faaauau ai ona nofo i Niu Sila, e ui o lea sa mafai ona totogi e le ACC ona togafitiga mai ni ma’i tugā o loo aafia ai.
O le tamaitiiti o Jonathan Ta’eiloa, na fanau i Niu Sila nei ia Setema o le 2023 ma sa malosi lava, ae o le tausaga na sosoo ai, na amata ai ona faaletonu i se tulaga ua faamanu’alia ai lona fai’ai.
Sa avatu le tamaitiiti i foma’i masani poo GP se’ia oo lava ina faatetele ma aga’i i Middlemore mo nisi siaki, ma i’u ai i le falema’i o tamaiti le Starship i le vaega o le ICU na mana’omia ai le matuā māta’itūina lelei.
E tele togafitiga na faagasolo i si nei tamaitiiti ma sa mafai ona totogi uma e le ACC ma sa fesoasoani foi le Te Whatu Ora i le lagolagoina o le talosaga mo lona visa, ona ua tula’i mai le mana’omia ona tausia pea o ia i Niu Sila nei e foma’i faapitoa.
E silia ma le tausaga o iai pea lenei tamaitiiti i le falema’i ma le tele o ta’otoga sa faia i lona fai’ai, ma ua faaaogā foi se faaga’au e fafaga ai, lea ua mana’omia ai se tausiga faaauau.
Peitai o lea ua sau le tala, ua lē talia le talosaga, ma o le Aso Toonai nei e uma ai le aogā o lona visa, e ui o lea e iai le visa faigaluega o ona mātua se’ia aulia le 2028 ma o loo lelei foi visa o isi ona tei.
Faaleo le lagona faanoanoa o si ona tinā ma na ia ta’ua, e silia ma le $5000 le tupe ua faaalu e le latou aiga i totogi o loia, o lipoti e moomia mai le falema’i iinei faapea lipoti na mana’omia mai le matāgaluega o le soifua mālōlōina i Tonga.
O le tala na tuu atu i si tinā, ona e fai lava si tele ma tugā ma’i o loo aafia ai Jonathan, e telē la se tupe a tagata totogi lafoga a Niu Sila o le a alu ai i le tausiga o lana tama.
Ua toe tasi le faamoemoega o le aiga, o le faaaogā o le Vaega e 61 o le tulafono o femalagaa’iga, e faataga ai le Immigration New Zealand e tuuina atu se visa i se tasi o lea ua nofo faasolitulafono i totonu o le atunuu.
Afai ae talia lena visa, ona toe faatulafono ai lea o le nofo a Jonathan i Niu Sila, peitai e lē faamalosia le Immigration e iloilo lena talosaga, ma afai e teena, e leai se isi malosi’aga faaletulafono e mafai ai e le aiga ona toe apili se faai’uga.
Talosia ia e manuia taumafaiga o loo faia e si aiga mo si nei tamaitiiti.
Puna o Faamatalaga: https://pmn.co.nz/read/political/nz-born-toddler-denied-visa-despite-severe-brain-injury-faces-risk-of-unlawful-status
