Ua faamaonia le fasioti tagata pa’ivalea o Mikaele Ah Fook ma ua faasala e nofovaavaaia i lona fale (home detention) ina ua talia e le Faamasino le talosaga a le aiga o le tamā ua maliu, ua latou matuā faamagalo ia Mikaele Ah Fook.
O le alii Samoa o Mikaele Ah Fook, sa galue o se avepasi i pasi o loo feoa’i i Aukilani, ae tula’i mai ai se faalavelave ina ua ia faaoolima i se tamā e 61 tausaga o le soifua, o Peter Mark Te Kira e mafua mai se feeseesea’iga ina ua musu Te Kira e totogi lona pasese e ui i le tele o le taimi sa taumafai ai Mikaele e finau atu i lenei tamā ina ia totogi lona pasese.
Pe tusa o le 1.40pm i le aoauli o le aso 27 o Aperila i le tausaga talu ai, 2025 na tula’i mai ai lenei faalavelave i se nofoaga faatalipasi e lata i Great South Rd i Papatoetoe.
E māua i lipoti sa faasuā’avā le tamā ua maliu i lea aso, lea na fiu ai le avepasi e tāpā sona pasese, ma e lē gata ina musu e totogi le pasese, ae na toe alu i fafo mai le pasi ma fai foi nisi gaioiga e pei o le tui o lona lima se’i tulou ia Mikaele ma lalafo mai ni upu faatigā, sa palauvale mai iai e toe foi i lona atunuu.
O le faamatalaga a Mikaele, o lafoga faailogalanu na a Te Kira na lē mafai ai loa ona toe onosa’i ae ua oso ese mai lona nofoa ua alu atu i fafo ma tu’i loa Te Kira; na pa’u atu i tua le tamā ma sasa lona ulu i le simā ma matapogia ai.
Na toso e Mikaele le tamā i le fale faatalipasi e faanofo faalagolago iai ma faapulou ae toe oso i lana pasi ma alu ese, mulimuli ane na faavave atu Te Kira i le falema’i i Aukilani, ma i le tolu aso mulimuli ane na uma ai lona soifua, ma o le māfua’aga o le maliu o ni manu’aga i lona ulu.
Ina ua faatalanoa e leoleo Mikaele, sa ia ta’utino lona masiasi ona ua ia faapogaia le maliu o se tagata matua.
Na faamaonia na upu o le salamō, e lē gata na ioe i ona moliaga o le fasioti tagata pa’ivalea ina ua valaau lona faamasinoga ia Oketopa, ae na faatino foi le aganuu faa-Samoa o le ifoga i le aiga o le tamā ua maliu i se marae o Maoli i Aukilani i Saute i le masina o Tesema, ma sa malaga mamao mai ona mātua mai Samoa ina ia auai i lea sauniga o le ifoga, ma toe malaga mai foi ina ua lau le i’uga o le faamasinoga o Mikaele.
Ae o le itu na matuā maofa ai le faamasino, ina ua tula’i le afafine o le tamā ua maliu e fai lana faamatalaga i aafiaga o latou mai le maliu o si o latou tamā, ma ia ta’ua ai e ui i le misia o si ona tamā auā o se tagata e aga mālie ma e lē talia gofie le motusia o le latou mafutaga, ae ua latou matuā faamagalo ia Mikaele ma e leai so latou agaga e toe fia taui ma sui pe tumau pea ni o latou lagona tigā ia Mikaele.
Sa ta’ua e le afafine le ifoga na faatino atu e le aiga o Mikaele ma na ia ta’ua, e lē manana’o ina ia iai pea ni lagona matamuli o Mikaele mai le mea ua tupu, ae ia taumafai uma o latou aiga, ia toe faafoisia lagona fiafia sa iai a o le’i tula’i lenei faalavelave.
O Mikaele Ah Fook e 34 tausaga o lona soifua, ma ua silia ma le 10 tausaga talu ona malaga mai i Niu Sila nei e aumau ma galue ai.
Puna o Faamatalaga: https://www.nzherald.co.nz/nz/crime/auckland-bus-driver-mikaele-ah-fook-sentenced-for-manslaughter-of-passenger-mark-te-kira/JJLN7NGFTRF2DE5JBLXBJQ43A4/?utm_medium=Social&utm_campaign=nzh_fb&utm_source=Facebook&fbclid=IwY2xjawPw6NFleHRuA2FlbQIxMABicmlkETF1cEJPV1JCdThHTnh4ZXNMc3J0YwZhcHBfaWQQMjIyMDM5MTc4ODIwMDg5MgABHgVb4Z_AFkuQw9TD4-BEyd6NGzDDa2STKaU5pPTSkCa0AvlqcxGfin35MXQt_aem_zBh1S9lhtADPbxwf0dQy_w
