O loo aoao mai manogi o le lolo auā le faaleleia atili o le auaunaga a le Matagaluega o Faamaumauga a Samoa.
I talaaga e faapea, i tausaga ua mavae, sa masani ona fai fesootaiga a le ofisa o faamaumauga a Samoa ma le ofisa o Resitala a Niu Sila i tausaga taitasi mo le faaleleia o galuega faatino a nei ofisa.
Peitai sa fai si umi e lei toe faatinoina lea tulaga.
Peitai la, o le tausaga lenei ua maua ai le avanoa e toe faaauau ai lea fesootaiga poo sootaga a matagaluega nei a atunuu e lua e toe faatalanoa ai nisi o auala aemaise o fesootaiga televavave faaonaponei ua faaaogāina e faamaumau ai faamaumauga mo tagata soifua.
O lenei sootaga ua toe tatala atu lea e le ofisa o Resitala a Niu Sila e tauala atu i le ofisa o le UNDP, lea na mafua ai loa ona malaga mai sui e toavalu, o sui o le ofisa o le UNDP, ofisa o faamaumauga, ofisa o pepafanau faatasi ai ma le matagaluega o le Soifua Maloloina.
Ma o se faigapaaga tāua tele lea avanoa ua toe maua.
Ae na saunoa le afioga ia Mama Tofilau Anish Christian Tua, e tele ni auala poo ni metotia fou ua latou a’oa’oina mai i lenei fonotaga, ma o loo iai foi le latou talitonuga e talafeagai lelei auala nei o loo faaaogāina i Niu Sila mo Samoa.
O auivi ma auala (system) o loo faatinoina ai galuega i totonu o Niu Sila e tutusa lelei ma vaega o loo faatinoina ai galuega a Samoa, ae peitai e iai lava nai isi auala fou ua maualuga ai le faatinoina o galuega a le ofisa o Resitala a Niu Sila aemaise lava i auala faatekonolosi.
E tutusa faafitauli i le faatinoina o galuega ae fuafua lava galuega faatino i le tulafono, ma o le a taumafai foi ia oo iai galuega a Samoa i le faaaogāina o nei auala fou ua latou mauaina, ina ia faafaigofie ai ona saili faamaumauga mo tagata soifua i totonu o Samoa.
O le toe lalaga mai ai o le sootaga a le ofisa o resitala a Samoa ma Niu Sila ua iai le lagona o nei ofisa e lua e tatau pea ona faaauau i tausaga taitasi aemaise ai ia maua ni avanoa e a’oa’oina ai fanau lalovaoa auā le faatinoina o galuega i totonu o Samoa mo le agai i luma.
