O le amataga o le vaiaso nei sa faalauiloa ai le toe amatalia ai o le taamilosaga lakapi liki i le atunuu poo le Island of Origin lea ua fa ai nei tausaga o faatinoina pea.
E pei ona lipotia o lenei taamilosaga ua avea lea ma faamoemoe e mata uma iai le atunuu ma tele ai ona lagolagoina lona faafoeina.
I le amataga o lenei taamilosaga sa manumalo ai le ‘au a le Tumua Maroons ae peitai i le lua tausaga talu ai sa molimauina ai le siamupini o le ‘au a le Puleono Blues ma aveavea’i ai lenei manumalo.
Na ta’ua e le Faatonu o lenei taamilosaga Laulu Filifilituna Tovio o le tausaga lenei ua vaaia ai le auai o nisi o sui mai ‘au tetele a le atunuu ma o se laasaga ua maualuga atu i le tulaga o le taleni lakapi liki i alo ma fanau a le atunuu.
“E tele foi nisi o tama taaalo mai le tele o kalapu i le atunuu o loo tauva mo avanoa e taaalo ai i lenei taamilosaga.
“O le molimau ola lea e faailoa ai le naunau o fanau i le taaloga i la latou foi faasoa i vaega o le a galulue ai ina ia manuia ‘au o le a taaalo ai.”
O lenei foi taamilosaga o le a faia ai foi ma le taamilosaga a tamaitai.
O loo faagasolo i le malae a le ACP i Lotopa le vaega muamua o le taamilosaga ona foi lea i le taaloga lona lua i le motu tele i Salafai ma o le a faia lea i le malae a le Aoga Tulagalua i Gataivai ona toe foi mai lea i Upolu mo le taaloga e sailia ai le siamupini o lenei foi tausaga.
