O le faamautū ai o le aso 27 o Fepuari e faatino ai palota laiti a itumalo faapalota o Safata 1 ma Vaisigano 2, o lea ua faailoa e le Komesina o faigāpalota suafa o sui tauva mo faigā filifiliga a ia itumalo ina ua tapunia le faauluina atu o sui faatutū i le Aso Faraile ua mavae.
O Safata 1 e to’alima sui ua faaulu atu suafa e aofia ai tama’ita’i e to’alua.
Fuimaono Mimio
O i latou ua faailoa mai suafa o Luailepou Tikilapilesa Misi, Tafāfuna’i Aialii Anapu, Tafāfuna’i Sa’olotoga Fuimaono Mimio, Tuigamala Vaisilika Vaaiga Tuigamala, ma Tunumafono Clare Tai Tin.
I le itumalo o Vaisigano 2 e to’alua sui faatutū ua lesitala ai o lē sa manumālō i le palota tele ia Aokuso o le tausaga ua mavae le afioga Motuopuaa Seve Henney Henry Papalii, ma lē sa seei i le nofoa o le itumalo i le paea’iga 17 a le Palemene ma sa avea ma minisita o le Kapeneta i lena paea’iga faapalemene le afioga Valasi Luapitofanua Tafito Selesele.
Photos: Office of the Electoral Commission – Samoa
Ua faailoa i auala o fesoota’iga a le patī faaupufai e puipuia aiā tatau a tagata, o le afioga Valasi o le latou sui tauva lea i le palota laitiiti a Vaisigano 2.
Ae o le afioga Motuopuaa o le a tauva i le vaega faaupufai o le Faatuatua i le Atua Samoa ua Tasi.
O le palota tele faanatinati ia Aokuso o le tausaga ua mavae e to’alima sui sa tauva mo le nofoa o Vaisigano 2 lea e to’alua sui sa tauva mo le Faatuatua i le Atua Samoa ua Tasi, to’atasi le sui o le pati o le Samoa ua Potopoto, tasi le sui sa tauva mo le Vaega e Puipuia Aiā Tatau a Tagata ma le sui sa tauva faatuto’atasi na manumālō.
I Safata 1 e to’atolu na tauva ai i le palota tele faanatinati lea e tasi le sui sa tauva i le fu’a a le Samoa ua Potopoto, tasi le sui tauva o le Vaega e Puipuia Aiā Tatau a Tagata ma le sui sa tauva mo le Faatuatua i le Atua Samoa ua Tasi na manumālō.
O moliaga o faiga faaālatua ua faamaonia i le tagi tau palota a Safata 1 ua soloia ai le nofoa ma toe faia ai lana faigā filifiliga i le palota laitiiti.
O Vaisigano 2 ua avanoa le nofoa ma toe faia ai lana palota laitiiti e sa’ili ai sona tofi i le Palemene ina ua faamavae le sui sa avea ma faipule tuto’atasi i le paea’iga 18 o iai nei a le Palemene, e māfua ina ua momoli i le patī a le Faatuatua i le Atua Samoa ua Tasi ma solia ai aiaiga o tulafono tumau ma le tulafono o faigāpalota lea e noatia ai sui faipule ona toe avea ma sui o se isi vaega faaupufai pe a mae’a ona faatauto tofi o itumalo i le mae’a o se faigāpalota e filifili ai sui mamalu o itumalo mo nofoa o le Palemene.
O le Aso Tofi o le vaiaso nei e faamuta ai le avanoa e toe faasolomuli ai i tua se suafa o se sui tauva mo faigā filifiliga a ia itumalo e lua.
