I le auaunaga a le soifua mālōlōina ua faalauiloa aloa’ia nei e le matāgaluega faamatalaga e faatatau i se tasi o faama’i ua logoina mai e le faalapotopotoga o le soifua mālōlōina o le lalolagi le Nipah Virus ina ia silafia e le atunuu ma tapenapena iai.
I le taimi nei, e leai ni gasegase ua faamaonia o le vairusi o le Nipa i atunuu o le Pasefika e aofia ai ma Samoa, ma o loo maualalo pea le tulaga lamatia mo le mamalu lautele.
Ae peita’i, e tāua lava fautuaga ma le māta’itū lelei mo le nofo tapenapena, faapea ma faatinoga faasoifua mālōlōina i aso fai soo.
O faamatalaga mo le nofo silafia i le taimi nei o le vairusi o le Nipa, o se faama’i e seāseā ona tupu, ma e mafai ona pipisi mai manu i tagata, ma i nisi tulaga, e mafai fo’i ona pipisi mai le tagata i le isi tagata.
O aafiaga e ono aofia ai le fiva, ma e oo ina aafia ai le fai’ai poo le mānava.
Ua lipotia mai i nisi atunuu, le ogaoga o lenei gasegase ma le maualuga o le tulaga o le maliliu ai o tagata.
Talu mai ona alia’e ma iloa lenei faama’i i le tausaga e 1998, o atunuu e tele na lipotia na aafia i lenei gasegase e aofia ai vaega o Asia i Saute ma Asia i Saute Sasa’e e pei o Meleisia, Sigapoa, Filipaina, Bangladesh ma Initia.
Ua na o le atunuu o Initia o lea ua lipotia mai le pipisi ai i le masina talu ai, Ianuari 2026, i se vaega o le atunuu.
O le manu o le pe’a (fruit bats) o loo faamauina o le nofoaga masani o le vairusi o le Nipa, ma e lē aafia pe ono ma’i ai.
E mafai ona pipisi le vairusi i le tagata soifua e ala i le fesoota’i vāvālalata ma manu ua aafia, e pei o pe’a poo puaa, poo le taumafaina o mea’ai ua aafia poo ua pisia ona o pe’a.
E leai se vailaau faapitoa poo se tui ua faamaonia mo le vairusi o le Nipa i le taimi nei, ae peita’i o loo faaauau pea su’esu’ega a atunuu o le lalolagi.
Ua faailoa mai fo’i e le Faalapotopotga o le Soifua Mālōlōina o le Lalolagi (WHO), o lenei vairusi o le Nipa e mana’omia ona māta’itū lelei ina ia fesoasoani i tapenaga, ona o lona aafiaga i le soifua mālōlōina lautele.
