E ogaoga lava aafiaga o nisi faaitu o le atunuu i le faai’uga o le vaiaso talu ai, mai tulaga loulouā o le tau na iai.
Na faasilasila le tulaga o Faalavelave Faafuase’i poo le State of Emergency mo le itumalo atoa o Tararua lea e i le pito i lalo o le Motu i Mātū o Niu Sila.
Na faapena foi le tulaga na iai le Waipā District ma le Ōtorohanga District.
Na matuā faaleagaina le tele o fale aemaise o faato’aga ma lafumanu i na faaitu, ma o loo faamalosia pea lapata’iga o timuga mamafa mai lava i le aso ananafi e faaauau atu i le afiafi nanei o le asō.
O loo lapata’ia e le vaega o pulega o faalavelave faafuase’i, i faaitu o Manawatū e oo i Whanganui, e ono toe tula’i mai ni lōlōga ma ni eleele solo.
Na ta’ua e le sui sooupu o le pulega i na faaitu, Chay Hook, ua avatu le lapata’iga i tagata uma o loo nonofo i na faaitu lea e masani ona oso ai lōlōga i taimi loulouā faapenei o le tau, ua tatau ona nofosauni e oese mai o latou fale pe a vaaia ua amata ona siisii le suavai.
O le lapata’iga a lea sui sooupu, e lē tatau i tagata ona faatali se’i avatu ni poloa’iga mai le pulega, ae ia nofosauni lava latou e vave ona oese.
Puna o Faamatalaga: https://www.rnz.co.nz/news/national/586891/weather-heavy-rain-and-damaging-gales-set-to-lash-eastern-and-southern-north-island
