E ono faia vave se palota a Ausetalia ina ua toe faalauiloa mai e le faigamalo o iai nei le latou pili faatatau i fale housing bill i le Palemene.
O le Palemia o le atunuu, Anthony Albanese ua fuafua na te fofogaina fuafuaga o le pili lea Housing Australia Future Fund bill i le fale maualalo o le Palemene pe a toe tauaofia ai le vaiaso fou.
O se tasi lenei o faiga faavae autu a le malo ma sa pasia i se taimi e lei mamao atu i le maota o Sui peitai e lei pasiaina i le senate.
O le vaegatupe o loo aofia i lea pili o le a tuuina ane ai le 500 miliona i le tausaga e fesoasoani mo le fausiaina o fale.
Ina ua faailoa e le soofaatasi o lea fuafuaga e ma’umau ai le taimi, sa faapea foi ona faaleo ai e le Green e le o lava mea o loo ofoina atu i lea pili ma sa mananao ai ia 5 piliona i le tausaga e faaalu i fale ae mulimuli ane toe tuu mai i lalo lea aofaiga i le 2.5 piliona.
Afai ae lē pasia le pili lea i le Upper House e ono saili e le malo se mafuaaga e faatino ai se palota i le mataupu.
Afai ae tulai mai le faaiuga lea o lona uiga o le a faaleaogaina loa e le Kovana Sili maota o le Palemene ma toe fai faigapalota.
O le taimi mulimuli na tulai ai se faiga faapea i Ausetalia o le double dissolution election o le 2016.
