O le fuafuaga a le malo e aveese mai le Matāgaluega o Tinā ma Tama’ita’i, Atina’e o Afio’aga ma Aga Fesoota’i le poloketi miliona, o le a amata ai i le vaiaso fou ona faatalanoa i Upolu ma Savaii le ata faata’ita’i o le tulafono tau faaofi mo le faavaeina o se pulega fou poo se isi auaunaga a le malo na te pulea ma vaaia lea poloketi o le atina’e o nuu ma afio’aga o itumalo faapalota uma o le atunuu.
Ua faailoa e le matāgaluega o iai nei le pulea ma le vaaia o le poloketi miliona, o Savaii o le a amata ai ia faatalatalanoaga i le Aso Lua o le vaiaso fou ae o le Aso Lulu e faia i Upolu.
O loo fautuaina ai le mamalu o le atunuu e auai e faaali o latou finagalo aemaise i sui o komiti o Fono Faavae, o sui o nuu ma sui tama’ita’i o afio’aga.
O loo iai le fuafuaga o le a faaigoa lea auaunaga fou o le Pulega o Atina’e o itumalo.
