O Tesema o le tausaga e 2016 na umusa ma tatala ai se tasi o faleoloa tele, o se hypermarket o le kamupani a Frankies i Vaitele i le tau e sefulu miliona tālā.
O le Aso Gafua o lenei vaiaso na faaumatia ai i le malaia poo le afi lea faleoloa tele o se tasi o nofoaga e tumutumu iai le atunuu i faatauga, a o ona lumafale o loo faagaioi ai pisinisi laiti a nisi o le atunuu.
O loo faia su’esu’ega a le fuimū ma leoleo e sa’ili le māfua’aga o le mū ae o le tele o oloa ma isi meatotino tāua ma aogā na faatama’ia uma i le afi.
O le galuega a le vaega o le fuimū ma galuega lavea’i i taimi o faalavelave faafuase’i na mafai ona titina ai le mū.
O le tausaga e 2025 ina ua tatala se isi faleoloa tele o le kamupani a Frankies i Siusega na faailoga ai ma le 30 tausaga talu ona faagaioia pisinisi tau faleoloa a lea kamupani i lo tatou atunuu, lea na amata i se faleoloa supamaketi i Fugalei i le tausaga e 1995.
O le taimi nei ua iai pisinisi mo oloa faufale ma oloa mo le faatotogaina o laoa ma maota a Frankies o se kamupani ua tele ona faleoloa supamaketi i vaega eseese o le atunuu.
O le tulaga foi i galuega mo i latou o le a lē afaina, lona uiga e faaauau pea ona galulue i latou mo le kamupani a Frankies.
I se faamatalaga faalaua’itele mai le pulega o le kamupani ua faailoa ai e leai se soifua o le aufaigaluega i le faleoloa ua faatama’ia na aafia.
Ua faafetaia le galuega a le fuimū sa lē mafai ai ona sosolo atu le afi ma aafia ai nisi o pisinisi o loo tu lalata ane i le nofoaga sa iai le pisinisi ua aafia i le malaia.
