E lua masina talu ona lavevea taavale a se tinā na so’a e se isi taavale a o paka i luma o le latou auala, ae faato’ā maua mai le totogi o le inisiua mai le kamupani inisiua a le avetaavale lea na soso’aina latou taavale.
E lua taavale a le aiga o le tinā ia Aries Chen, o le Mazda CX-5 ma le Nissan Tiida, sa paka uma i luma o le latou auala i Bayswater street i le aso 2 o Ianuari ae soso’a ai e se taavale i le te’a o le 6am i le taeao o lea aso.
Fai mai le tinā, o le Nissan Tiida o le taavale sa faaaogā e feavea’i si ana tama teine e lima tausaga, e iai ona mana’oga faapitoa, e ave ai i lana a’oga i Glenfield, ona o le taavale lea e iai lona nofoa faapitoa mo le teineitiiti, ae o lea na faaleagaina ai ina ua lavea le taavale.
O le taavale lea, Tiida, sa inisiua i le AMI i lalo o le third party cover, lona uiga e mana’omia le inisiua a le avetaavale lea na lavea ai ana taavale, e totogi ai le toe lipeaina o mea na faaleagaina o le taavale.
Peitai e lua masina o faatalitali le talosaga mo le inisiua, ona e faapea le tala, e le’i lelei ona fai peimeni o le inisiua a le avetaavale lea na soso’aina ana taavale.
E tele mea eseese na faia e si tinā lea i le taumafaiga e una’ia faavave se tali mai le kamupani inisiua a le isi avetaavale, ma e le’i faavaivai i le sa’ili uma o lipoti ma ata o le faalavelave ma oo atu ai i le kamupani inisiua a le isi avetaavale.
I Niu Sila, e lē o faamalosia le faia o le inisiua mo se taavale, o le ala foi lea o le faafaigata i nisi taimi pe a lavea se taavale mai se isi avetaavale, ae o lena tagata e lē o lelei ona totogi lana inisiua pe leai foi se inisiua.
Afai e lavea lau taavale ae o loo atoa lelei le totogiina o le inisiua o lau taavale, e mafai e lau kamupani inisiua ona toe fai atoa le taavale, ona aga’i loa lea e tulituli le isi avetaavale lea e lē o iai se inisiua ina ia kava mai tupe ua totogi.
Peitai e ono moomia ai ona e totogia se excess i lau kamupani inisiua faato’ā aumai i tua lau taavale, ma lē maua ai sau discount o au peimeni lea e fai e kamupani inisiua pe uma le tausaga e le’i iai se claim e te faia i lau inisiua.
Mai le Insurance Council of New Zealand, o loo latou una’ia le to’atele o tagata e fai a latou taavale, e lelei pe a faaaofia i latou policy le ‘uninsured motorist extension’ (UME) poo le puipuiga mo le avetaavale e le’i sesē (innocent party protection), poo le third party, ina ia faamautinoa ai o le a lē sala ai le avetaavale ua inisiua.
O lalo o lena extension policy, e mafai ai e le kamupani o loo faia lau inisiua ona aveese le excess lea na semanū e te totogia, ma tumau ai pea lau no-claim discount; o se matāupu foi e tāua ona tatou nofosilafia iai pe a fuafua e fai ni inisiua mo tatou taavale.
Puna o Faamatalaga: https://www.1news.co.nz/2026/03/06/womans-long-wait-for-payout-over-crash-drivers-insurance/
