O loo sauni le Senate a Amerika e faia le latou palota i le matāupu e faatatau i le tuuina o se tapulaa i malosi’aga o le alii Peresetene o Donald Trump e faatonuina ai le faia o osofa’iga tau militeli i totonu o Iran.
O le fuafuaga lea e mana’omia ai le toe aveesea mai o vaegā’au a Amerika mai Sasa’e Tutotonu se’i vaganā ua ioeina e le Konekeresi a Amerika peita’i fai mai le CNN o nisi foi taumafaiga faapea sa faatino i se taimi ua sola, e le’i manuia ma e lē o mailoa foi poo le ā tonu se aogā o lea fuafuaga pe iai ai se suiga i le taua ua amatalia nei.
O loo finau mai le vaega a le Temokarasi ua una’i ese e Trump i tafāala le Konekeresi ae faatino le taua.
Ua faailoa e i latou ia e tatau i sui o le senate ona faailoa o latou finagalo pe o se tulaga lelei mo le atunuu le ave atu o alo o le atunuu e tau i Iran, ma o le latou finau e lē tatau ona faatino lea tulaga ma e tatau ona palota ina ia taofia.
Afai ae pasia e mana’omia ona tuuina atu i le US House of Representatives e palota ai foi latou a o le’i tuuina atu le mau i le Peresetene.
Fai mai le faigāmalo a Trump ua mae’a ona o latou faatino tulaga uma e mana’omia ona faia a o le’i faataunuuina le osofa’iga i Iran.
Puna o Faamatalaga: https://www.bbc.com/news/articles/c5yjj28jjd0o
