E lē o toe mamao ae amata ona faatino se tasi o faiga faavae fou a le malo o le su’eina o tagata faigaluega uma o tautua i matāgaluega ma faalapotopotoga a le malo, i le taofia o le faaaogāina o nakoti poo fuālaau faasāina.
Ua faailoa e le Palemia susuga Laaulialemalietoa Leuatea Polataivao Fosi o le a totogi lava e le matāgaluega ma le faalapotopotoga a le malo le faia o ia su’ega poo test e faaaogā ai le auaunaga a le nofoaga tutotonu o su’esu’ega faasaienisi i Nafanua le SROS.
O le ofisa o le Loia Sili ua faailoa e le Palemia o loo gafa ma le tapenaina o aiaiga o ta’iala faaletulafono e lima ta’ita’iina faai’uga pe a iai nisi o le au faigaluega a le malo e faamaonia lo latou faaaoga o nakoti pe a maua le faai’uga o su’esu’ega.
O taualumaga a le Palemene i le masina amata o lenei tausaga na faailoa ai e le ta’ita’i o le malo o le tasi lea o laasaga tāua i le taua faasaga i fuālaau faasāina o le su’eina o tagata faigaluega a le malo ma su’e ai foi ma sui mamalu o le Palemene.
