Ua siitia le fesoasoani tupe a le malo ua tuuina atu e fesoasoani ai i le tausiga o nisi o tamā ma tinā matutua ua faamautū i le nofoaga o Mapuifagalele i Upolu ma Logoipulotu i Savaii.
O se fesoasoani tāua tele ona o ia seleni e lagolago ai i le galuega a ituaiga o Tama’ita’i Sa o loo gafa ma le tausiga o ia matua tausi.
Na amata le fesoasoani i le 20 afe tālā peita’i ua faailoa e le Minisita o le Matāgaluega o Tinā ma Tama’ita’i, Atina’e o Afio’aga ma Aga Fesoota’i, ua oo atu i le malo faamaumauga i le faaaogāina o ia seleni ma iloa ai, e lua i le tolu masina e faaaogā ai le 20 afe ae mae’a.
O nofoaga o loo tausia ai nisi o o tatou mātua tausi e faalagolago tele i le aao mafola o tagata ma faalapotopotoga faapea ekalesia eseese e mu le loto e fia fesoasoani e ala i taumafa ma seleni.
