Ua manumālō le komisi e pulea tagata faigaluega a le malo o Samoa poo le PSC i le faailoga o le taulagalaga i le faia o ni suiga lelei i le siitia o auaunaga eseese o loo faatino e le aufaigaluega a le malo.
O le polokalame a le malo o Ausetalia o le Tautai ua auala mai ai lea faailoga taualoa ua faaigoaina o le Tautai Innovations award 2026.
Ua faailoa i se faamatalaga faalaua’itele mai le komisi, o le faailoga ua manumālō ai lana auaunaga e afua mai i nisi o ana taumafaiga ma polokalame mo le faaleleia o le auaunaga faalotoifale a tagata faigaluega mo le tautuaina o le atunuu ma le malo.
O le tasi o ia polokalame o le Talofa ma le laufofoga fiafia poo le Talofa with a Smile.
O le faletalimalo o le Tanoa Tusitala i Sogi i se faatasiga na faia ai i le vaiaso nei na faalauiloa ai ma le faailoga o le taulagalaga i suiga lelei, mai le polokalame o le Tautai a Ausetalia ua manumālō ai le komisi e pulea tagata faigaluega a le malo.
